Publikoak eskertzen du Euskal Denda-ren ahalegina

 Euskal Denda aurrera doa eta aurten ere publikoaren babesa lortzen ari da. Atzoko goiza lasai-lasai ibili ginen, baina arratsaldea arrakastatsua izan zen, hainbat  lagun hurbildu ziren Durangoko udal merkatu plazara, Euskal Dendan murgiltzeko. Han gozatu zuten artisauekin eta konturatu ziren denbora aurrera doala eta artisauak gero eta garaikideagoak direla.

Durangoko Euskal Denda tradizio handienetako da Euskal Herrian. Esan beharrik ez dago, Arbaso, Euskal Herriko artisauen elkarteak antolatzen duen azoka hau erakusleiho garrantzitsuena dela; horregatik bada, lurralde guztietako artisauek parte hartuko dute, beste behin ere. Abenduaren 6ra arte Euskal Denda ezinbesteko hitzordua da artisaua bizirik dagoen gremioa dela erakutsarazteko, baita ohartarazteko ere tradizioz, ofizioz eta trebetasunez beterik datorrela, ilusioz eta itxaropenez, baina batez ere, hobetzeko gogoz.

Euskal Dendaren helburu nagusia artisautza tradizionala zein garaikidea bultzatzea eta merkaturatzea da, beti ere, Euskal Herrian egindakoaren zigiluaz. Beraz, aukera ezin hobea da bisitariek bertatik bertara artisauen lanak ikusi eta goza dezaten, eginkizun ia ezinbestekoa profesional hauek biziraungo badute. Esperientzia honi esker, bisitaria ohartuko da lanbide zaharrak indarrean daudela, eta ez dela pieza sortu berrien kalterako.

Aurrekoetan egin den antzera, Euskal Dendak Euskal Herriko lurralde guztietako ordezkariak izango ditu. Guztira 52 artisau izango dira Araba, Bizkaia, Nafarroa Behera, Gipuzkoa, Lapurdi eta Nafarroatik etorritakoak. Espazio txikia dela-eta, Euskal Denda ezin da gehiago hazi, ezinezkoa du artisau gehiago sartzea. Hala ere, urterik urte, lanbidea egokitu eta garaikide bilakatzeko eginahalak egiten dituzten artisau abangoardista gehiago ekartzen dira. Etorriko diren denetatik, hamazazpi izango dira lehenengoz gure artean, artisautza azokan.

Lurraldekako parte hartzea dela eta, Bizkaiak du ordezkari gehien, hogeita lau artisau, iaz baino lau gehiago. Beraz, azokaren % 34,6 berritu da. Gipuzkoatik hamalau ditu; Nafarroatik zazpi; Arabako ordezkariak, iaz bezala, bost dira; Lapurditik eta Nafarroa Beheratik bana dira.

Sektoreei dagokienez, aurten bitxigintza, zeramika eta ehungintza dira nabarmentzekoak, 9, 8 eta 7 erakusketari ditu bakoitzak, hurrenez hurren. 
Ordutegia 11:00 – 14:30

16:30 – 21:00